У Нядзелю, 4 верасьня, у царкве Сьв. Жыровіцкае Іконы Божае Маці ў Гайлянд Парку (Нью Джэрзі) адбылося адзначэньне 100-годзьдзя Беларускай Аўтакефальнай Праваслаўнай Царквы. 

Набажэнства ўзначаліў Высокапрывялебны Сьвятаслаў, архіяпіскап БАПЦ, які завітаў з Канады ў ЗША на  34-ю Сустрэчу беларусаў Паўночнай Амэрыкі.

У Гайлянд Парку сабраліся як парафіяне, так і беларусы, якія прыехалі на Сустрэчу. Архіяпіскапу Святаславу саслужылі настаяльнік Парафіі Мітрафорны пратаярэй айцец Зіновій, пратаярэй айцец Іван і дыякан Мікола – сьвятарства Катэдральнага сабору БАПЦ у Нью-Ёрку, а таксама сьвятарства Украінскай і Грузінскай Цэркваў.

Падчас набажэнства архіяпіскап Сьвятаслаў зачытаў ўрывак пра маладога чалавека з Евангельля паводле Мацьвея, які меў вялікае багацьце. Яму Хрыстос адказаў, што «лягчэй вярблюду прайсці праз вушка іголкі, чым багатаму ўвайсці ў Валадарства Божае».

 Тэрмін «іголкавая вушка» выкарыстоўваецца як метафара для вельмі вузкай адтуліны. Сьвятаслаў патлумачыў, што так і чалавеку складана ўвайсьці ў Валадарства Нябеснае. Для гэтага шмат ад чаго трэба адмовіцца і пайсьці за Богам.

“Кожны чалавек можа прысьвяціць сябе Богу і ўвайсьці ў Валадарства Нябеснае. Галоўнае, каб ён набываў багацьце духоўнае. Людзі рэдка задумваюцца пра вечнае жыцьце. Усе заклапочаныя зямнымі справамі. Але чалавек павінен знайсьці час, калі ён будзе раздумваць над сваім жыцьцём. І пачне імкнуцца да Бога. Хрыстос прыходзіў, каб чалавек мог быць разам з Богам”, – сказаў у прамове архіяпіскап Сьвятаслаў. 

Уладыка ўзгадаў, што працягваецца сьвята Успеньня Божай Маці. Таксама ён заклікаў не спыняцца маліцца за рэпрэсаваных рэжымам беларусаў і правёў такую малітву. Сьвятар нагадаў, што ў Беларусі тысячы людзей пазбаўлены волі за свае перакананьні і пазыцыю.

Пасьля Службы адбыўся сьвяточны абед, а таксама збор сродкаў на дапамогу братэрскай Украіне.

Падчас абеду архіяпіскап БАПЦ Сьвятаслаў распавёў пра трагічную гісторыю Аўтакефальнай Праваслаўнай Царквы на Беларусі. Пасьля прамовы людзі зьвярталіся да яго з пытаньнямі і маглі даведацца шмат цікавых фактаў пра БАПЦ.  

Алесь Пазьняк